三八婦女節 " 客家好棧晚飯 "

今日如常在家食早餐 , 同樣地閒話家常 .

  相公 : 今日出街吖 !

           我 : 去邊呀 ! 

   相公 : 重未諗到呀 !

           我 : 即是齋噏喇 ! 無喇喇做乜出街呀 ! 

                       係咪即是去食晏跟住去買餸 ?  
   相公 : 唔係0架 ! 行街食埋晚飯個隻呀 . 

           我 : 無 喇 喇 ! 做乜出街食晚飯 !

  相公 : 同妳慶祝 三八婦女節吖嘛 !

           我 : 吓係咩 , 今日係三八婦女節咩 ? 

                       我都唔知添 , 做乜咁好同我慶祝呀 !

  相公 : 嘩 ! 唔同妳慶祝 ! 妳會嬲0架嘛 ! 

           我 :  ...................   為之氣結 ( 駛唔駛咁坦白呀 ! )

                 
 

          

三八婦女節 ???  無論任何一個節日 , 
都係商人的賺錢機會 , 唯獨是這個三八婦女節 , 
就一啲都冇宣傳 , 可憐囉 ! 相公都叫做有少少表示 ,
其實都係巧立名目出街 hea 下啫 !
今次我們去荃灣周圍行 , 真係人太多了 , 
可能已適應咗新界居住 , 行街之時俾人踩咗幾次鞋 . 
好煩 . 都係早啲食晚飯返歸好囉 .
見到荃灣城市中心都好多食肆 , 這裡也有客家好棧 , 
內部裝修比較簡樸 , 坐位唔太舒服 , 
這間飯店有幾樣野 , 令我寫個服字 .
先講餸菜 :
1. 相公攞住本菜牌 , 
    同侍應姐姐一齊睇住逐個字讀比佢寫 ,
    客家啫啫魽魚煲 , 佢一路寫一路讀 , 
    客家啫啫鯇魚煲 , 咁都得0既 .
    叫幾味餸都攪到嚟咁 hea ,
2. 寫完餸行開咗 , 轉下頭又嚟過 , 
    唔出聲就在我們的叫餸紙上 , 寫上兩個砵仔飯 ,
    當時我看到隔離枱有人叫 " 兩個砵仔飯 "  
    她就係聽到隔離枱 , 講 " 兩個砵仔飯 " 
    就當係我地叫 , 真係服咗佢 .
3. 這裡侍應好奇怪 , 唔知乜事個個都穿上透明膠手套 .  
4. 見到個個侍應不停兩頭騰 , 但又唔知佢做緊乜喎 .

客家黃酒煮雞半隻 

客家啫啫魽魚煲

蟲草花蒸豬脷

砵仔飯

鴛鴦茶果 ( 三個鹹三個甜 ) 
今餐飯除了寫個服字之外 ,
還有餸菜都要給它幾個好字 . 
1 . 客家黃酒煮雞 : 好勁多油 .
2 . 客家啫啫魽魚煲 : 好鹹 .
3 . 蟲草花蒸豬脷 : 配菜同豬脷好韌 .
4 . 砵仔飯 : 飯面 D 飯好得意蒸到粒粒棟起 , 好得意 ! 
5 . 茶果 : 好大隻但好唔夠熱 .