早幾日到剛重新大肆裝修的領滙商場逛逛 ,
看到很多新的店舖已陸續開張 ,
其中海港酒樓也開張成個月了 ,
從外面看他內部裝修都幾靚 ,
今日放學後我和相公專程到這酒樓試試 ,
到達酒樓已下午2 點多鐘 ,
門外大概七至八位客人正等位 ,
我們攞了等位號碼耐性地等著 ,
突然聽到那位派紙姐姐說 :
如果二至三位願意搭枱現在就可以入座 ,
但我們衹欠2 個號碼就到 ,
反正都等咗咁耐無謂搭枱 , 繼續等吧 !
等了幾分鐘便入座 , 我和相公跟住服飾稍為高級的亞姐入去 ,
亞姐說 : 呢張喇 .
順眼一看 , 係一張8人枱
, 枱號並不是我們的枱號 ,
而且已坐著三組唔識的客人 , 當時我以為姐姐攪錯咗 ,
好心跟亞姐說呢張枱唔係我地的號碼喎 .
亞姐毫不客氣 , 黑哂口面好勞氣跟我說 :
外面嗰個人聽錯咗枱號 , 點解妳係要嗰個號碼啫
( 佢個樣好唔高興 ) 嘿嘿 , 聽佢咁講我登時氣上心頭 ,
我從沒有講過係要嗰張枱 .
如果亞姐態度唔係咁勞氣跟我們說外面攪錯枱 ,
你們就坐呢張喇 , 既然錯了搭枱都算嘞 ,
但呢位亞姐的態度真令人費解 , 本來好想立刻調頭走 ,
但嘥咗咁多時間等位 , 唉 ... 坐就坐喇 .
內部裝修都幾靚 , 前面仲有一部超大型的電視機 .
一坐低我們立刻劃點心紙 , 劃劃下 ,
同枱一位先生叫侍應話落紙成個鐘 ,
都未有一樣食物來 , 叫佢跟跟 ,
回來答覆跟本沒有落單 , 那位先生登時火都嚟埋 ,
指住一位服裝好似高級 d 的男士話係佢落單0架 ,
那位姐姐立刻答 : 佢係領導嚟0架 .
先生更加火滾大駡領導就唔鬧得咩 .
他們相方對答如流 , 我差
d 笑咗出嚟 .
我們為免有同樣問題發生 ,
都係唔好叫剛才的領導人落單了 .
潮州糯米卷、叉燒腸粉、雞扎、流沙奶黃包、豆沙煎堆仔 .
叉燒腸粉好滑 , 叉燒瘦得嚟又唔嚡
, 好味 .
雞扎 , 味道一般 ,
但嗰件雞肉好嚡
( 我從來未食過雞扎的雞肉咁嚡0既 )
流沙奶黃包 ,
輕飄飄食完好似冇食 .
食完呢個包 , 跟住就冇嘢食 , 開始等呀等 , 等咗唔知幾耐 ,
等到不耐煩搵返落單嗰位男生跟跟 , 佢去如黃鶴 ,
又搵個稍低級姐姐跟 , 回來比佢地落單的電腦紙給我睇 ,
錯單又漏單 , 重新更正又等了差不多半小時 ,
等食期間聽到好多枱客都係投訴食物冇來 .
但同枱另外的夫婦就好好彩沒有發生問題 ,
而且仲話呢度晚飯餸菜唔錯 , 叫我地都嚟試試 .
等到大部份客人都走得七七八八 , 才來豆沙煎堆仔 .
豆沙煎堆外面炸得好脆 , 好好食 ,
但餘下的潮州粉果都係冇嚟 , 唔等了 .
到外面比錢 ,
我們跟收錢的姐姐說張單有食物冇來 ,
佢搵另外一個高級亞姐埋嚟改單 , 我又要重覆剛才說話 ,
她竟然又係黑哂口面同我講 , 呢張單寫錯現在取消咗喇
,
你地又落單叫潮州糯米卷梗係要耐d 蒸熟先嚟喇 ,
真係火都嚟埋 , 我說 : 唔該攪清楚 , 我地唔係再落單 ,
而係你地漏單自己再落過又冇嚟咋 .
寫完呢篇網誌 , 愈諗愈覺得這間酒樓個別員工態度太有性格了 .
算了吧 !
無謂為這些沒有專業的人而氣憤 ,
破壞我明天去番禺長隆香江野生動物園的心情 ,
今次又係玩兩天 , 各位 blog 友後日見 !
沒有留言:
張貼留言