濕地 " 湯加 " 下午茶 "

又到濕地飯堂吃下午茶 , 

今次食 " 湯加 " 吃過下午茶到一田超市買餸 . 

果醋豬軟骨撈公仔麵套餐

配薯條伴多春魚 $ 45 熱飲柚子蜜 .

前排吃過這套餐覺得好好味 , 

今次再食味道同樣好味 . 

紅酒牛尾 $ 67 配三色飯 

牛尾炆得腍滑混上紅酒香味十足 , 

這個不是下午茶餐沒有飲品 , 

要另加熱飲柚子蜜 $ 7

今次炸薯條和多春魚炸得太乾硬 , 

上次我們叫一份炸芝麻球份量 6 個太多了 , 

所以今次衹加配 $ 9 芝麻球二個 , 

外皮炸得稍為過火 .

熱柚子蜜 .

到濕地食晏順道行幾步入一田超市逛逛 ,

( 這超市細細間餸菜款式比較少 )

我要求不高所以都鍾意入去買餸 .

清蒸黃花魚都算幾新鮮 .

木瓜腰果紅棗素湯

炆豬手 
 

逸逸居龍蝦套餐

 近年到酒樓吃晚飯 , 

餐牌上的主打菜式通常都有龍蝦 , 

今次到逸逸居吃晚飯 , 

菜牌上芝士焗波士頓龍蝦一隻跟伊麵 , 

配紅燒乳鴿兩隻衹要 $ 318 , 價錢很吸引 , 

除了這個餐我們還叫了一份鮮淮山涼瓜排骨煲 $ 98

燒乳鴿個子細細該是 BB鴿 , 

肉雖少但很嫩味道也不錯 . 

鮮淮山涼瓜排骨煲 

涼瓜太爽口好像未煮透 ,

                                             排骨和鮮淮山味道一般 .

芝士焗波士頓龍蝦幾新鮮 , 

肉質頗為爽口但味道明顯遜色於西澳龍蝦 , 

伊麵份量非常多在芝士襯托下很好味 . 

九龍城 " 清真牛肉館 "

" 清真牛肉館 " N 年前曾吃過這裡的牛肉餅 , 

印像中牛肉餅熱辣辣外皮微脆牛肉饀鮮嫩多汁 , 

當年一口咬下去裡面超熱燙的汁踐在嘴角好燙的 ,  

當年坐滿人要等位 , 所以今次特別揀下午五點幾入座 .

整間店跟 N 年前一模一樣無變 , 

但已顯得很陳舊了 , 侍應姐姐禮貌麻麻 . 

牛肉餅外貎跟以前一樣 , 價錢 $ 25 一件

菜單上有北京菜供應 .

曾被牛肉餅肉汁燙過嘴 , 

今次醒目帶埋較剪仔把皮剪開才食 , 

牛肉顏色比以前深色 , 

外皮腍而且少許韌唔脆又唔香口 , 

肉質算嫩但較鹹而且唔太熱的 , 有點失望 .  

羊肉嗆湯麵 $ 68 

羊肉片切得非常薄樣子好似肥牛 , 

醃料有些微孜然粉味 , 

沒有羊羶味好似食緊肥牛肉片 . 

這碗麵味道偏鹹 . 

牛肉湯水餃$ 46 10 隻 

送來我們忙著交換來食 , 

忘記先把餃子影下來 , 牛肉餃子十分鹹 . 

高力豆沙 $ 36 二件 

久違的口感終於在這裡找到 , 

外面熱辣辣又鬆軟 , 豆沙唔太甜 , 

可惜我們不想再來幫襯了 

( 食物太鹹招呼麻麻 , 座位又唔舒服 )

食完太鹹的食物本來想去食糖水緩和一下 , 

但印象中的糖水店已唔見哂 , 

衹見到很多屋宇正在拆卸中 , 

獅子石道賣成衣的店都沒有了 . 

反而看見好幾處街道的地上都有這些圖案 .

濕地 " 百分百 " 午後時光餐

又去濕地小區 ( 飯堂 )食晏 , 區內超過十間食肆 , 

有兩至三間我們不會幫襯 , 因為唔啱口味 , 

今次到 " 百分百 " 食午後時光餐 , 

清靜得很衹有三數張枱有客 , 

鮮茄焗一口豚肉飯配熱咖啡 $ 43 

豚肉醃得入味又唔嚡 , 

鮮茄混在飯中微酸好味道 , 熱咖啡很香濃 .

迷利無骨雞飯和碗仔翅配熱華田 $ 41 

很久沒有吃過碗仔翅 , 

食材也不少沒有水流流的感覺 , 

無骨雞很滑 , 兩份餐都算抵食了 .

 

海之戀 KiKi 下午茶

家住新界區每次出省都盡量找近港鐵的區域 , 

其中一個就是荃灣海之戀商場 , 這裡店鋪也不少 , 

時間許可的話可以外出海濱長廊吹吹風很寫意的 .

吃過午餐又到海之戀商場 , 

遊逛至傍晚5點多鐘行經 KiKi 店 , 

前鋪擺賣食品 ,  後鋪做食肆 , 

門外餐牌上食品款式不多 , 

這裡下午茶 2: 00 到 6 : 00 , 

當我們考慮食咩之際 , 裡面員工立刻出來跟我們打招呼, 

斯文有禮地說現在還有下午茶的 , 這樣才是待客之道嘛 ! 

 差不多 6: 00 鐘仍有下午茶 ? 好的就入試試 ! 

坐高椅邊吃邊欣賞外面海景也不錯 , 

我們坐横向沙發較舒服 , 

環境寜靜感覺有點像文青風格 , 

白桃烏龍茶 , 茶包份量很多 , 

平時我很少飲茶 , 通常我會立刻把茶包攞走 , 

淺賞一口淡淡清香的桃味和烏龍茶葉的味真不錯 , 

就這樣我竟然飲了半杯 . 

津白鮮肉水餃湯麵 $ 88 

麵口感不錯4 隻水餃 味道一般 , 

湯味濃郁好像用豬骨煲的 .

套餐可追加鹽酥雞 $ 38 

好酥脆醃得入味 , 真不錯 .

樹子醬蒸比目魚配珍珠米飯 $ 88 

遠看的樹子醬我以為係花生 , 

夾來食腍腍的裡面有核 , 

我以為像廣式酸梅有酸味但完全冇味 , 

豆卜冇味又硬 , 比目魚塊淡淡地我覺得用豆豉蒸較好 .

飯裡配溫泉蛋半隻還有滷腩肉條味道還不錯 . 

這裡環境清靜食完飯没有侍應員來打擾的 , 

可以繼續坐跟朋友聊天或看書 . 

我們甚喜歡這裡的白桃烏龍茶包 , 前鋪有得賣 , 

我們買了一罐回家 .

食過下午茶再前去賣豆乳的店看看, 

很多種口味的豆乳 , 本來想買7.6特濃口味 , 

但冇得賣了 , 退而求其次買一瓶凍 7 特濃豆乳回家喝 . 

白桃烏龍茶包 $ 65 

特濃無糖豆乳 $ 24 

回家立刻開豆乳來飲 , 味道果然好濃郁 ,  

( 比外國牌子豆漿濃得多多 ) 夾雜著豆香味, 

非常好味 , 下次再去一定再買 . 

 

薩莉亞意式餐廳

我愛吃 pizza 但相公覺得麻麻, 

今天相公竟然主動提出到 " 薩莉亞 " 吃晚餐 , 非常難得的 !

平民化意式餐廳價錢大眾化 , 

又不用收加一服務費 , 捧場客自然多 , 

我鍾意這裡份量少可以試更多口味的食物 , 

我們提早到達直接入店內 . 

意大利菜湯 $ 14 

湯裡除蔬菜外還有少許牛肉碎 , 

味道唔太酸 ( 相公至愛 )

意式白豆燉牛傘肚 $28 

第一次食這款食物 , 送來我以為羅宋湯 , 

白豆好粉腍牛傘肚是菌類少許爽口 , 

沒有特別味道汁稍咸 , 放入意粉裡一齊食較適合 .

意式菠菜伴煙肉 $ 20

羊鞍焗爐燒 $ 79 

羊鞍肉唔韌 , 炸薯仔粒趁熱好脆 .

野菌雞肉薄餅 $ 38 

很久沒有吃 , 特別覺得特別好味 .

肉醬意粉 $ 30 味道一般 . 

把所有食物吃光覺得好滿足 .

 

元朗形點 " 莆田 "

假期出外吃晚餐心裡有數預咗人多 , 

搵食較麻煩 , 我們提早到元朗形點一期 , 

看看有沒有想吃的食肆

 " 莆田 " 印象中幾年前好似在另一間食過 , 

但忘記食物水準如何 , 都想再入去試試 , 

當我們站在門前那一刻開始 , 

便有工作人員不停推介佛跳牆二人套餐 , 

心中想著希望試多些各地菜式 , 那麼就跟咗入去 , 

時間尚早除了近門口幾張枱有客外 , 

裡面全部吉枱很清靜 , 剛坐下 .... 櫈都未坐好 , 

侍應姐姐立刻過來放上前菜 , 唔啱口味的食物不要了 , 

另外一位姐姐立刻過來 , 又推介我們食佛跳牆二人餐 , 

不停嗶哩叭喇聲調大大的游說我們食佛跳牆二人餐 , 

聲音令我好煩 , 跟她說我想看看其他餸菜 , 

她稍停一停又游說起來 , 算了吧 ! 就要佛跳牆 , 

咩茶都冇問就行開 , 

衹見枱上有熱水壺就拿來把食具過過水 

( 哈哈過去幾年疫情的習慣 ) 

喔 .... 微黃的 ? 聞一聞 , 

呵呵 , 原來這是飲用的菊花茶來的 ( 大鄉里 ) 

飲啖試試淡如開心( 衹有微微菊花味和甜味) 

室內燈光較暗 , 樓頂的吊扇慢慢動著 , 

好像南洋風味的餐館 . 

佛跳牆二人餐 $ 798 茶錢每位 $ 18 另加一服務費  

食物有 : 1 . 蝦苗頭水紫菜 , 蝦苗我諗是蝦米仔麻麻唔想食 , 

侍應姐姐話可以換同價的餸 ( $ 58 ) 換做滷豆腐 . 

2 .金湯佛跳牆 ( 二盅 ) 

3 . 椒鹽豬手 ( 二件 ) 

 4  . 馬來風光即是蝦醬炒通菜 , 唔想食蝦醬換成蒜茸炒 

5 . 福建海鮮滷麵 . 

6 . 建蓮雪耳湯/ 薄荷批把凍 

滷豆腐細細長長五小件 , 

滷汁有別於其他食肆做法 , 麻麻地 ! 

唔啱口味而且冷冷的 , 

小蠟燭熱上差不多半小時才微微熱 .

福建海鮮滷麵果然真係二人餐 , 

蝦衹有兩隻 , 蛤 , 瑤柱 , 魷魚頭 , 腩肉切成細細條狀 , 

細丁方型豆卜還有些蔬菜( 大部份食材都切得細細 )

滷汁都係用滷豆腐的汁 , 麵好腍稍放涼變得糊糊的 , 

整碟麵味道好得意 , 好像有魚露味 .

椒鹽豬手二件 

豬手是近腳趾部位炆得好腍入味但不會散開 ,

再焗外皮熱辣辣好脆整件豬手沒有肉衹有筋 , 

膠質好重味道不錯 

豬手熱辣辣又脆 , 用手攞住食最好不過了 .

馬來風光蝦醬炒通菜 , 

吃不慣蝦醬改成蒜茸炒但送來都係蝦醬炒 , 

退回廚房等了很久才送來 , 

整碟菜見不到蒜茸衹有三粒蒜頭 , 一點香味都沒有 , 

懷疑先前的菜被水沖去蝦醬味再加三粒蒜頭罷了 .

金湯佛跳牆 

餸菜排序有點怪 , 餸菜到齊食哂此湯都末送來 , 

等到悶唯有招手叫侍應姐姐問問 , 

過了很久才送來 , 又係用小蠟燭座著都算熱的 , 

食材有 : 一小件冇味好嚡硬的雞 , 

竹笙 , 瑤柱 , 小刺參 , 鵪鶉蛋 , 鮑魚仔 , 

還有不知名的菇片味道好濃 , 把其他食材的味道全蓋過 , 

覺得湯衹有菇的味一點都不討好 ( 每樣食材都係一件 )

湯裡的瑤柱好大粒 , 可能煲得太耐好腍鮮味走了 . 

微微熱的建蓮雪耳湯又係姗姗來遲 , 

紅棗蓮子各一粒 , 雪耳腍到起膠微甜 .