劉森記竹昇麵 VS 公和豆腐花

今早遊 blog 看到雀后用樹記的腐皮碎做鮮腐皮雞扎 , 

樣子同茶樓冇分別超靚 , 引得我好想學做 , 

以往我都有到樹記買腐皮碎煲糖水 , 

但沒有想過可以做雞扎 , 一於買料跟 .

立刻行動先到深水埗買腐皮 , 

每次到樹記買嘢都要排隊 ,

好彩今次人唔太多 , 排半條街啫 , 

但都咪攪我 , 相公超鍾意食支竹 , 

我都唔多鍾食0既 , 所以由他排隊就最啱嘞 , 

哈哈 , 我就周圍逛睇下嘢 , 大概 15 分鐘返去搵相公 , 

時間啱啱好 , 相公剛剛買完了 , 

睇下佢買乜先 , 支竹一斤 , 腐皮一斤 , 素鴨兩件 ,

相公買完至愛支竹 , 跟住就話要食佢0既至愛牛腩撈麵 , 

佢仲指明要去劉森記食添 ,

" 點解 " 佢話聽講呢間店的麵係用竹昇 Un 出嚟爽口啲喎 . 

這間麵店都唔難搵 , 但有分新舊舖 , 

我地去新舖食 , 等一陣就有位 . 

 Un 麵歷史都好耐 .

相公至愛牛腩撈麵 , 

每次問佢好吃嗎 ? 例牌答案好食呀 , 

但今次答案有少少唔同 , 

好食呀 , 牛腩好稔滑唔嚡好味 , 今次又會講咁多個字0既 . 

我唔食牛同蝦冇得選擇 , 衹有魚旦片頭麵 , 

魚旦同湯稍鹹 , 魚片一般 , 

麵冇相公所講傳聞中咁爽口彈牙 , 我覺得一般 , 

唯一好處係食唔到梘水味 , 但麵吸入湯的鹹味 , 

所以都係稍鹹 , 這麵店價錢幾抵食 . 

食完 Un 麵諗起雀后提過去公和食豆腐花 ,

咁我地倆個為食貓又周圍搵公和 , 

行嚟行去 , 又問人終於發現佢比街檔阻住 , 我地經過咗都唔知 , 

舖內幾多人 , 逼都要試下佢0既豆腐花和煎釀豆腐 . 

豆腐花我好耐都冇食過熱辣辣咁滑0既豆腐花了 , 

煎釀豆腐又係好滑 , 豆腐煎得好靚黃黃地又脆脆地 . 

本來仲想試埋釀豆卜 , 但太飽留待下次先試 . 

兩碗豆腐花裝得好滿 .